Ավելի ուժեղ խորհրդարանական ընդդիմություն չի եղել. Հ. Իգիթյան

դեկտեմբերի 25, 2018

Հարցազրույց «Իմ քայլը» դաշինքի անդամ Հովհաննես Իգիթյանի հետ

-Պարո՛ն Իգիթյան, ինչպե՞ս եք աշխատելու նոր խորհրդարանում՝ չլինելով իշխող «Քաղաքացիականպայմանագիր» կուսակցության անդամ:

-Ես կուսակցության անդամ չեմ, բայց անդամակցելու եմ «Իմ քայլը» խմբակցությանը: Ծանոթ եմ ՔՊ-ի ծրագրին, նրանք էլ ծանոթ են իմ մոտեցումներին, որոնք ես երկար տարիներ ներկայացրել եմ հարցազրույցներում: Հեղափոխության օրերին և նաև դրանից առաջ մեր մոտեցումները համընկել են, այնպես որ ես չեմ կարծում, թե որևէ խնդիր կառաջանա: Պարզ է, որ խորհրդարանական աշխատանքում խմբակցությունը մեծ դեր է ունենալու, ես այդ խմբակցության անդամ եմ ու հույս ունեմ, որ մենք արդյունավետ կաշխատենք: Այսինքն, կուսակցության անդամ լինել-չլինելը լուրջ խոչընդոտ լինել չի կարող:

-Ո՞ր հանձնաժողովում և ո՞ր պատվիրակություններում կընդգրկվեք:

-Հաշվի առնելով խորհրդարանում իմ ինը տարիների փորձը և իմ աշխատանքը միջազգային կազմակերպություններում որպես փորձագետ, ես կաշխատեմ արտաքին հարաբերությունների հանձնաժողովում և ներգրավված կլինեմ խորհրդարանական դիվանագիտության կազմակերպման ու իրականացման հարցերում:

-Հնարավո՞ր է, որ նաև ղեկավարեք այդ մարմինները:

-Երբ կազմում էինք դաշիքնի համամասնական ցուցակը ու մասնակցում ընտրություններին, յուրաքանչյուրս տեսնում էինք մեր առաքելությունը խորհրդարանում և ոչ թե կոնկրետ պաշտոնում: Ես համոզված եմ, որ կկարողանամ իմ դերակատարությունն ու մասնակցությունն ունենալ տարբեր միջազգային կազմակերպություններում: Պետք է կոլեգաների հետ համատեղ լուծել այդ հարցը:

-Դուք կլինեք ԵԽԽՎ-ում հայաստանյան պատվիրակության կազմո՞ւմ, թե՞ ԵԱՀԿ ԽՎ-ում:

-Իհարկե, ԵԽԽՎ-ում՝ հաշվի առնելով, որ եղել եմ այնտեղ հենց առաջին խորհրդարանական պատվիրակության ղեկավարը: Չլինելով պատգամավոր՝ ես աշխատել եմ 2008-ի մարտի 1-ի իրադարձություններին անդրադարձող ԵԽԽՎ 1609 բանաձևի վրա, որն օգնել է այն տարիների քաղբանտարկյալներին մեկ օր շուտ ազատություն ստանալ:

-Խորհրդարանական նախկին մեծամասնությունը պնդում էր, որ իրենք հաջողել են խորհրդարանական դիվանագիտության մեջ: Դուք, եթե ընդհանուր դիտարկենք, ի՞նչ ժառանգություն եք ստացել:

-Հենց միայն իր լեգիտիմությամբ այսօրվա խորհրդարանը չի կարելի համեմատել նախորդի հետ: Նախորդ խորհրդարանից հանրությունը շատ քչերին էր ճանաչում, ավելին, նրանց դժվար էր խորհրդարանում տեսնել: Նախկինում մարդիկ միայն իրենց անձնական շահի համար էին գնում խորհրդարան: Այսօր, ես համոզված եմ, նման բան չկա: Ես վստահ եմ՝ մեր դաշինքում չկա մարդ, որը մտել է դաշինք իր անձնական շահը առաջ տանելու համար: Ինչ վերաբերում է ժառանգությանը, կարծում եմ, որ խորհրդարանական դիվանագիտությունը եղել է գործադիրի վերահսկողության տակ, որևէ նախաձեռնությամբ հանդես գալիս կամ Սերժ Սարգսյանին իրենց կարծիքը հայտնելիս եղել են կաշկանդված: Հիշենք 2015 թ. սեպտեմբերի 3-ը, երբ մի գիշերում հայտարարվեց ԵԱՏՄ-ին միանալու մասին, և ԵՄ-ին անդամակցության կողմնակիցները դարձան Մաքսային միության ջատագովներ:

-«Իմ քայլը» դաշինքը նոր խորհրդարանում բացարձակ մեծամասնություն է. մտավախություն չունե՞ք, որ նախկինի նման գործադիրը նախագծեր է ներկայացնելու, իսկ օրենսդիրը ընդամենը «դակելու» է դրանք:

-Իհարկե, չկա մտավախություն, որովհետև համեմատության եզրեր անգամ չկան նախորդի հետ: Այս խորհրդարանը ստացել է ժողովրդի արդար քվեն, իսկ դա ոչ միայն լեգիտիմություն է, այլ նաև պատասխանատվություն: Պետք է հաշվի առնենք, որ ժողովուրդը իր քվեն տվել է ոչ թե «Իմ քայլ»-ին սիրելու, այլ սպասելիքների համար: Ինչպես ստացել, այնպես էլ կկորցնենք մեր վարկանիշը, եթե Ազգային ժողովը ուշադիր չքննի այն նախագծերը, որոնք կառավարությունից գալիս են խորհրդարան: Մենք պետք է լինենք բուֆեր ժողովրդի ու գործադիրի միջև, և ժամանակը ցույց կտա՝ կստացվի՞ թե՞ ոչ:

-Ինչպիսի՞ն կլինի համագործակցությունը խորհրդարանական ընդդիմության հետ:

-Կարծում եմ՝ Հայաստանի խորհրդարանական պատմության մեջ ավելի ուժեղ փոքրամասնություն չի եղել: Գերագույն խորհրդում մեր երկու պատգամավորը կարողանում էին օրենքներ փոխել: Հիշեք «Ելք» խմբակցության դերակատարումը: Այսօր փոքրամասնությունը 44 պատգամավոր ունի: Պատկերցանո՞ւմ եք՝ 44 ելույթ, 44 առաջարկություն: Ես կարծում եմ՝ դա բավական մեծ թիվ է: Տեսնենք՝ այդ 44-ի մեջ կստեղծվի՞ կորիզը, որը կառուցողական կամ թեկուզ առճակատվող քննարկում կծավալի: Ես ճանաչում եմ շատերին թե՛ ԲՀԿ-ից, թե՛ ԼՀԿ-ից, ու կարծում եմ՝ շտապում են նրանք, ովքեր հայտարարում են, թե նոր խորհրդարանում ընդդիմություն չի լինելու:

-Պարո՛ն Իգիթյան, ինչպե՞ս եք գնահատում ՀԱՊԿ-ի գլխավոր քարտուղարի պաշտոնի շուրջ ստեղծված իրավիճակը, նաև նույն այս իրավիճակով պայմանավորված՝ Բելառուսի նախագահի արտահայտությունները Հայաստանի վարչապետի հասցեին:

-Ցանկացած կազմակերպության աշխատանք պետք է կանոնակարգված լինի, այսինքն, պետք է առաջնորդվել կանոնադրությամբ և ոչ թե այս կամ այն պետության ղեկավարի պատկերացումներով: Կանոնադրությունը չի ասում՝ ինչ անել, եթե գլխավոր քարտուղարի լիազորությունները վաղաժամ դադարեցվում են: Հայաստանը փորձում է այս իրավիճակում լինել կոնստրուկտիվ, և մենք չենք պայքարում նախագահ Լուկաշենկոյի դեմ՝ փորձելով առաջ տանել մեր թեկնածուին: Մենք փորձում ենք կանոնադրական փոփոխություններով ամրագրել սկզբունք, որը կբխի անդամ պետությունների շահերից: Եթե նույն Բելառուսի թեկնածուն ինչ-ինչ պատճառներով վաղաժամ դադարեցնի իր գործունեությունը, երկիրը պետք է շարունակի պաշտոնավարել սահմանված եռամյա ժամկետում: Սա է Հայաստանի մոտեցումը: Ունի՞ Բելառուսը կոնստրուկտիվ առաջարկ՝ ի՞նչ անել այս դեպքում, մինչ այս պահը չեմ տեսել:

-Ձեր դիտարկմամն՝ կա՞ լարվածություն Հայաստանի և Բելառուսի միջև:

-Չէի ասի: Լարվածությունը երկրների միջև այլ կերպ է լինում: Նույնիսկ Բելառուսի կողմից Ադրբեջանին մասսայական ոչնչացման զենքի վաճառքը լարվածություն չառաջացրեց: Մենք դրան նայում ենք որպես ոչ տրամաբանական քայլ, որովհետև եթե մի կազմակերպությունում հավաքված են դաշնակից երկրներ՝ կոլեկտիվ անվտանգություն ապահովելու համար, անտրամաբանական է անդամ երկրի հակառակորդին զենք վաճառելը: