Խորհրդարանում լինելու է «Սասնա ծռեր» խմբակցություն. Ս. Գրիգորյան

դեկտեմբերի 7, 2018

Հարցազրույց «Սասնա ծռեր» կուսակցության պատգամավորության թեկնածու Ստեփան Գրիգորյանի հետ

-Արտահերթ խորհրդարանական ընտրությունների քարոզարշավը ավարտվեց. Ձեր գնահատմամբ այն ինչպե՞ս անցավ:

-Նախոր քարոզարշավների համեմատ՝ դրական տարբերությունն ակնհայտ էր, կարելի էր ազատ քարոզարշավ անցկացնել, թեպետ Գյումրիում, Կոտայքում փող բաժանելու մասին ենք լսել: Մարդիկ հրաժարվում էին այդ մասին բացահայտ խոսել, և մենք ահազանգեցինք պատկան մարմիններին: Դատախազությունն արձագանքեց, և դա, կարծես, կանխարգելիչ եղավ:

-Ո՞ր ուժերն էին գումար բաժանում:

-Չեմ կարող ասել, քանի որ չունեմ ապացույցներ: Մարդիկ այդ մասին խոսում էին, բայց հրաժարվում էին հրապարակավ հայտարարելուց: Ընտրարշավի ժամանակ մեր շուրջ համախմբում կար, մարզային բոլոր հանդիպումները ստացված էին, շատ էին հիսուն, հարյուր, երեք հարյուր հոգանոց հավաքները: Դա նշանակում է, որ «Սասնա ծռեր» կուսակցությունն ունի աջակցություն: Ունենք շուրջ 60 շտաբ, չեմ հաշվում ենթաշտաբերը. մարդիկ տարածքներն անվճար էին տալիս, շատ կամավորներ մեզ հետ մարզեր էին գալիս իրենց մեքենաներով ու ծախսով։ Կուսակցությունն ինձ ու այլ անկախ գործիչների հրավիրեց, և սա ևս աջակցության մեծացմանը նպաստող գործոն է: Շատ հանդիպումներում իմ ճանաչելիությունը գրեթե 100% էր. ուր գնում էի, մարդիկ ողջունում էին, որ միացել եմ «Սասնա ծռերին», և ես տեսնում եմ, որ ԱԺ անցնելու հնարավորություն կա:

-ՀՅԴ Գերագույն մարմնի ներկայացուցիչ Արսեն Համբարձումյանը Parliamentmonitoring.am-ի հետ զրույցում զարմանք էր հայտնել, թե ինչ գործ ունեն Ստեփան Գրիգորյանը և Պետրոս Մակեյանը «Սասնա ծռեր»-ում. որ դուք ո՛չ Սասնա ծուռ եք, ո՛չ Ձենով Օհան, ո՛չ էլ Քեռի Թորոս: Ինչպե՞ս կարձագանքեք:

-ՀՅԴ վերնախավը բավական վատ է զգում նոր տենդենցները, չի խորանում աշխարհում ի հայտ եկող նոր միտումների մեջ և չի հասկանում, թե ինչ է կատարվում Հայաստանում: Եթե նրանք ուշադիր կարդային «Սասնա ծռերի» ծրագիրը, կտեսնեին, որ մենք շատ խիստ ենք դնում հայ-ռուսական հարաբերությունների հարցը: Ռուսաստանի նկատմամբ իմ դիրքորոշումը բավականին արմատական է, այս հարցում մեր տեսակետները համընկնում են: «Սասնա ծռերը» համարում են, որ Արևմուտքի, ԱՄՆ-ի հետ պետք է ակտիվ աշխատել: Այստեղ ևս առկա է համընկնում, այսինքն, իմ՝ «Սասնա ծռերի» ցուցակում լինելը տրամաբանական է: Ես շարքային դաշնակցականների մասին չեմ խոսում, այնտեղ շատ ազնիվ մարդիկ կան, բայց վերնախավը պարզապես կտրված է կյանքից: |Դա է պատճառը, որ ՀՅԴ-ն վերջին ամիսներին մի քանի անգամ փոխեց իր կարծիքը:

-Ինչպե՞ս կարձագանքեք Հանրային հեռուստատեսության բանավեճի ժամանակ «Լուսավոր Հայաստան» կուսակցության նախագահ Էդմոն Մարուքյանի հայտարարությանը, թե «Սասնա ծռերը» ոստիկաններ են սպանել, բայց զղջման խոսքեր չեն ասել։

-Մարդիկ տարբեր բաներ են ասում, բայց ես խորհուրդ կտայի ավելի օբյեկտիվ լինել: Ընտրարշավ է, մարդիկ ուզում են ձայն հավաքել, բայց չեմ կարծում, որ այդ հայտարարությունը նրանց ձան կբերի: «Սասնա ծռերը» լրջագույն քայլ արեց, որով կանխեց տարածքների կորուստը։ Ափսոս, որ ոստիկաններ զոհվեցին, բայց այդ զոհերը «Սասնա ծռերի» հետ կապ չունեին: Նրանք նախկին իշխանության զոհն են։ Եթե մարդիկ ուզում են ձայն հավաքել ոչ թե փնովելով և անհիմն մեղադրանքներով, թող ներկայացնեն իրենց ծրագիրը և արված գործը:

-Եթե անցնեք խորհրդարան, իշխանության հետ կոալիցիա կկազմե՞ք թե՞ կմնաք ընդդիմության կարգավիճակում:

-Ընդդիմադիր բառը սխալ է, ճիշտ կլինի ասել երկրորդ բևեռ: Տեսնենք՝ ընտրությունից հետո ինչ վերադասավորումներ կլինեն, կլինի՞ կոալիցիա թե՞ ոչ, դրանից հետո նոր միայն կոալիցիայից դուրս մնացածներին կարելի է ինչ-որ իմաստով ընդդիմություն ասել:

-«Սասնա ծռերը» դեմ է Հայաստանի անդամակցությանը ԵԱՏՄ-ին՝ դա համարելով վերպետական ինստիտուտ: Եթե Հայաստանը ԵՄ-ին անդամակցելու հնարավորություն ունենա, դարձյալ դե՞մ կլինեք:

-Այսօր անիմաստ է խոսել դրա մասին, մենք այնքան հեռու ենք դրանից, բայց կյանքը դինամիկ է, կարող են անսպասելի փոփոխություններ լինել: Ինձ երբեմն հարցնում են՝ գուցե վտանգավո՞ր է ԵԱՏՄ-ից դուրս գալը, ես ասում եմ՝ ինչո՞ւ քննարկել այդ հարցը, որոշ ժամանակ անց ԵԱՏՄ-ն ինքն է քանդվելու:

-Պ՞ետք է, արդյոք, փոխել Սահմանադրությունը:

-Այո: Դա միայն մեր ուժի դիրքորոշումը չէ, դա հեղափոխության պահանջներից է: Պետք է բալանսավորել վարչապետական համակարգը, հանել ռեյտինգային ընտրակարգը, փոխել կուսակցությունների մասին օրենքը, և լուծել ֆինանսավորման հարցը, քանի որ պառլամենտական համակարգում մենք պարտավոր ենք զարգացնել բազմակուսակցականությունը։

-Ինչպե՞ս եք գնահատում հետհեղափոխական կես տարին։

-Կառավարության վարած քաղաքականությունը շատ հարցերում ճիշտ է։ Դրական եմ գնահատում կոռուպցիայի դեմ պայքարը, մենաշնորհների թուլացումը։ Միաժամանակ հասկանում ենք, որ խնդիրներ կան։ Մենք կարծում ենք, որ կոռուպցիայի դեմ պայքարը պետք է համակարգային լինի, մինչդեռ առայժմ ընտրովի պայքար ենք տեսնում։ Բոլոր խնդիրների մասին կխոսենք խորհրդարանում։