«Ծառուկյան» խմբակցություն
«Ծառուկյան» խմբակցությունը 6-րդ գումարման Ազգային ժողովի ամենամեծ ընդդիմադիր խմբակցությունն է: Կազմված է 31 պատգամավորից: 16-ը ընտրվել է «Ծառուկյան» կուսակցությունների դաշինքի համապետական ցուցակով, 15-ը՝ տարածքային ընտրացուցակներով: Խմբակցության 31 պատգամավորից 25-ը «Բարգավաճ Հայաստան» կուսակցության անդամ են, մեկական ներկայացուցիչ խմբակցությունում ունեն ՀՀՇ և «Ալյանս» կուսակցությունները: Խմբակցության 4 պատգամավոր անկուսակցական են. նրանցից 2-ը Գագիկ Ծառուկյանի դուստրերի ամուսիններն են (Դավիթ Մանուկյանը և Արգամ Աբրահամյանը), անկուսակցական են նաև Հովիկ Աբրահամյանի զարմուհի ԿարինեՊողոսյանը և Գյումրիի նախկին քաղաքապետ Վարդան Ղուկասյանը: Կանայք խմբակցությունում 8-ն են: «Ծառուկյան» խմբակցության կազմում է մեկ ազգային փոքրամասնության ներկայացուցիչ՝ Տատյանա Գրիգորևնա Միքայելյանը:
Խմբակցության անդամ է ԱԺ նախագահի երեք տեղակալներից մեկը՝ Միքայել Մելքումյանը: ԱԺ 9 մշտական հանձնաժողովներից 3-ի նախագահները ևս «Ծառուկյան» խմբակցությունից են: Խմբակցության ղեկավարը Գագիկ Ծառուկյանն է, քարտուղարը՝ Վահե Էնֆիաջյանը:
Քաղաքական անցյալ: «Ծառուկյան» խմբակցության հիմք հանդիսացող քաղաքական միավորը 2017 թվականի խորհրդարանական ընտրություններին մասնակցել է որպես «Ծառուկյան» կուսակցությունների դաշինք: Այն ձևավորվել է ընտրությունից ընդամենը 3 ամիս առաջ՝ «Բարգավաճ Հայաստան»,«Ալյանս», «Առաքելություն» կուսակցությունների միավորմամբ: Դաշինքի ուժերից «Բարգավաճ Հայաստանը» 4-րդ Ազգային ժողովում ունեցել է 25, 5-րդում՝ 37 պատգամավոր: ԲՀԿ-ն մասնակցել է 2007-2012 թվականներին ձևավորված բոլոր կոալիցիաներին՝ այդ տարիներին պահպանելով 3 նախարարական պորտֆելի քվոտան: 2012թ. խորհրդարանական ընտրություններից հետո հրաժարվել է ՀՀԿ-ի և ՕԵԿ-ի հետ կոալիցիա ձևավորելուց: