«Հայաստանի Հանրապետական կուսակցություն» խմբակցություն
6-րդ գումարման Ազգային ժողովում ՀՀԿ-ն ունի բացարձակ մեծամասնություն: Խմբակցությունում ընդգրկված է 58 պատգամավոր: 28-ն ընտրվել է ՀՀԿ համապետական ցուցակով, 27-ը` ընտրատարածքային: ՀՀԿ խմբակցության անդամ են 6-րդ գումարման Ազգային ժողովում ներկայացված 4 ազգային փոքրամասնություններից 3-ի պատգամավորները: Հանրապետական են ԱԺ նախագահն ու նրա երեք տեղակալներից երկուսը, ԱԺ 9 մշտական հանձնաժողովներից 6-ի նախագահները: «Հանրապետական» խմբակցությունում կան 14 անկուսակցական, 4 այլ կուսակցությունների անդամ պատգամավորներ: Կանայք ՀՀԿ խմբակցությունում 8-ն են: Խմբակցության ղեկավարը Վահրամ Բաղդասարյանն է, քարտուղարը` Գագիկ Մելիքյանը:
Կառավարությունը ձևավորվել է ՀՀԿ-ՀՅԴ կոալիցիայի սկզբունքով, որի համաձայն ՀՅԴ-ին է տրվել 3 նախարարական պորտֆել, փոխնախարարի մարզպետների պաշտոններ: Կառավարությունում հանրապետական են 18 նախարարություններից 11-ի ղեկավարները եւ վարչապետ Կարեն Կարապետյանը:
Քաղաքական անցյալ: ՀՀԿ-ն ստեղծվել է 1990 թվականին, երկրի քաղաքական կյանքում լուրջ դերակատարություն է ստանձնել 1999թ.-ից: 1999-ի խորհրդարանական ընտրություններին ՀՀԿ-ն մասնակցեց «Հայաստանի ժողովրդական կուսակցության» հետ կազմած դաշինքով, որն ստացավ ընտրողների քվեների 42 տոկոսը: 2003-ի և 2007-ի ընտրություններին կուսակցությունը մասնակցել է միայնակ և խորհրդարանում մեծամասնություն ձևավորել. 3-րդ գումարման Ազգային ժողովում ՀՀԿ-ն ուներ 40 մանդատ, 4-րդ գումարման ԱԺ-ում` 62, 5-րդ գումարման ԱԺ-ում՝ 69 մանդատ:
Ունենալով միայնակ կառավարություն ձևավորելու հնարավորություն` ՀՀԿ-ն միշտ նախապատվությունը տվել է կոալիցիոն կառավարությունների ձևավորմանը: